በኦሮሚያ ክልል በተቀሰቀሰው ግጭት የተፈናቀሉ ዜጎችን ክልሉ ፈጥኖ ማቋቋም አለበት – አቶ ተመስገን ጥሩነህ

አቶ ተመስገን በተለይ ለኢዜአ እንደተናገሩት የአማራ ህዝብ ከክልሉ ውጭ በአብዛኛው የአገሪቷ አካባቢዎች ከሁሉም ጋር በጋራ መኖር የሚችልና የዜጎችን በነጻነት ተንቀሳቅሶ መስራት የሚደግፍ ሕዝብ ነው ብለዋል።

ያም ሆኖ በተለያዩ ጊዜያትና አካባቢዎች የብሄርና የሃይማኖት መልክ የሚይዙ ግጭቶች እየተቀሰቀሱ ንጹሃን ዜጎች ሰለባ እየሆኑ መሆኑን ገልጸዋል።

ከሰሞኑ በኦሮሚያ ክልል የተለያዩ አካባቢዎች በተቀሰቀሰው ግጭትም ተዋልዶና ተሳስሮ የሚኖር ህዝብ ኢትዮጵያዊ እሴቶችን በመጻረር በንጹሃን ላይ የደረሰውን ጥቃት የክልሉ መንግስት ያወግዘዋል ብለዋል።

ወደ አገር ልማት የሚገባው ቅድሚያ የዜጎችን ደህንነት ማስጠበቅ ሲቻል መሆኑን ገልጸው፤ መንግስት ህግ የማስከበር አቅሙን መወጣት ይገባዋል ነው ያሉት።

በግጭቱ ሁሉም ህዝብ ተጎጂ መሆኑን ገልጸው፤ በፖለቲካ ልዩነት ምክንያት ንፁሃን ዜጎች ላይ ጥቃት መድረስ የለበትም ብለዋል።

የክልሉ መንግስት ከሰሞኑ በደረሰው ጥቃት ጉዳት የደረሰባቸውን ዜጎች በአፋጣኝ ማቋቋም እንዳለበትም ገልጸዋል።

የአማራ ክልል መንግስት ጉዳት የደረሰባቸውን ዜጎች ለማቋቋም ለሚደረገው ተግባር አስፈላጊውን ድጋፍ እንደሚያደርግም አረጋግጠዋል።

(ምንጭ ኢዜአ)