በወረባቦ ወረዳ አሸባሪው ትህነግ ጥሎት የሄደውን ቦንብ ሲነካኩ የነበሩ ሕጻናት ህይወታቸው አለፈ፡፡

አሸባሪውና ወራሪው የትህነግ ቡድን በደቡብ ወሎ ዞን በወረባቦ ወረዳ 018 ቁኖ ቀበሌ ወረራ በፈጸመበት ወቅት ንጹሐንን በግፍ ገድሏል፡፡ በአሸባሪው ቡድን ላይ መከላከያ ሠራዊት፣ ልዩ ኀይል፣ ሚሊሻ፣ ፋኖና የአካባቢው ኅብረተሰብ በወሰዱበት ጠንካራ እርምጃ ሲደመሰስ የተረፈው ደግሞ አካባቢውን ጥሎ ፈርጥጧል፡፡

መስከረም 03 /2014 አሸባሪውና ወራሪው የትህነግ ቡድን በደረሰበት ከባድ ምት ጥሎት የሸሸውን ቦንብ ሲነካኩ የነበሩ ሦስት ሴት ሕጻናት ቦንቡ በመፈንዳቱ ህይወታቸው ማለፉን የወረባቦ ወረዳ የሕዝብ ሰላም እና ደኅንነት ጽሕፈት ቤት ገልጿል፡፡ ህይወታቸው ካለፉት ሕጻናት በተጨማሪ አንድታዳጊ ከባድ ጉዳት ደርሶበት ህክምና እየተደረገለት መሆኑም ታውቋል፡፡

የወረባቦ ወረዳ የሕዝብ ሰላም እና ደኅንነት ጽሕፈት ቤት ኃላፊ መሐመድ ሰይድ የጥፋት ቡድኑ ሽንፈት ሲደርስበት በየቦታው የሚጥላቸው የጦር መሳሪያዎች ስለሚኖሩ ኅብረተሰቡ ጥንቃቄ ማድረግ ይኖርበታል ብለዋል፡፡

(አሚኮ)