የእስክንድር ነጋ ደህንነት አደጋ ላይ ነው !


መረጃ ቲቪ አባል በመሆን የሳተላይት ቲቪውን ቀጥታ ስርጭት፣ ወቅታዊ ዜናዎችን እና ትንተናዎችን፣ የመዝናኛ ፕሮግራሞችን፣ ስፖርት እና ሌሎችንም ዝግጅቶቻችንን በፍጥነት እና ጥራት ስልክዎ፣ ኮምፒዩተርዎ ወይም ቲቪዎ ላይ ማየት ይችላሉ። እዚህ ሊንክ ላይ በመጫን አባል ይሁኑ


የእስክንድር ነጋ ደህንነት በማረሚያ ቤት !
የባልደራስ ለእውነተኛ ዲሞክራሲ ፓርቲ ፕሬዘዳንት እና እጩ የሆነው እስክንድር ነጋ በአዲስ አበባ ቃሊቲ ከፍተኛ ጥበቃ ማረሚያ ቤት በግፍ ታስሮ የሚገኝበት ሁኔታ ከፍተኛ ስጋት ፈጥሮብናል፡፡ የእስክንድር ነጋ አያያዝ ፓርቲው ሲከታተል የቆየ ሲሆን፣ በተለይም ከግንቦት 27 ቀን 2013 ዓ/ም ጀምሮ ቀድሞ ታስሮበት ከነበረው “ዋይታ” ተብሎ ከሚጠራው ዞን በደረሰበት የሰብዓዊ በደል ምክንያት 8ኛ ዞን ተብሎ ወደሚጠራው ቦታ እንዲዛወር ተደርጓል፡፡
ሆኖም አሁን ታስሮ ባለበት ቦታ በእስረኞች የደህንነቱ ሁኔታ፣ አደጋ ላይ እንደወደቀ የፓርቲው ከፍተኛ አመራሮች ማረሚያ ቤቱ ድረስ በመሄድ ለማረጋገጥ ችለዋል፡፡
ፓርቲያችን፣ እስክንድር ነጋ እየገጠመው ያለውን የደህንነት አደጋ፣ ማረሚያ ቤቱም ሆነ ጠቅላይ ዓቃቤ ሕጉ እያወቁ መፍትሄ ለመስጠት ባለመፈለጋቸው አዝኗል፤ ችግሩ ከኦህዴድ/ብልጽግና የበላይ አካላት የተሰጠበት ፖለቲካዊ አቅጣጫ እንደሆነ የሚያሳይ ሆኖ አግኝተነዋል፡፡
የቃሊቲ ማረሚያ ቤትም ሆነ በሕግ የእስረኞችን ደህንነት የማስጠበቅ ኃላፊነት የተጣለበት ጠቅላይ ዓቃቤ ሕግ፣ የእስክንድር ደህንነት አደጋ ላይ በመውደቁ ምክንያት ሊፈጠር ለሚችል ማናቸውም ነገር ሙሉ ለሙሉ ኃላፊነቱን እንደሚወስዱ ማስገንዘብ እንወዳለን፡፡
የእስክንድር ነጋ ደህንነት ኦህዴድ/ብልጽግና በፍትህ አደባባይ ለደረሰበት ውርደት መበቀያ ሳይሆን የመላ ሀገሪቱን ደህንነት አደጋ ላይ የሚጥል ቀይ መስመር መሆኑን ተረድቶ፣ ለተፈጠሩ ችግሮች ባስቸኳይ መፍትሄ እንዲሰጥ ፓርቲያችን መንግሥትን ማሳሰብ ይወዳል፡፡
ድል ለዲሞክራሲ
ሰኔ 01/2013
አዲስ አበባ – ባልደራስ ለእውነተኛ ዲሞክራሲ ፓርቲ