ግብፅ እና ሱዳን የአፍሪካ ህብረት የተሰጠውን ሃላፊነት የሚያንኳስስ ሙከራ ማድረጋቸው ተቀባይነት የለውም – ኢንጂነር ስለሺ


መረጃ ቲቪ አባል በመሆን የሳተላይት ቲቪውን ቀጥታ ስርጭት፣ ወቅታዊ ዜናዎችን እና ትንተናዎችን፣ የመዝናኛ ፕሮግራሞችን፣ ስፖርት እና ሌሎችንም ዝግጅቶቻችንን በፍጥነት እና ጥራት ስልክዎ፣ ኮምፒዩተርዎ ወይም ቲቪዎ ላይ ማየት ይችላሉ። እዚህ ሊንክ ላይ በመጫን አባል ይሁኑ


(ኤፍ ቢ ሲ) ግብፅ እና ሱዳን የአፍሪካ ህብረት የተሰጠውን ሃላፊነት የሚያንኳስስ ሙከራ ማድረጋቸው ተቀባይነት እንደሌለው የውሃ፣ መስኖና ኢነርጅ ሚኒስትሩ ዶክተር ኢንጂነር ስለሺ በቀለ ገለጹ፡፡ ሚኒስትሩ በዴሞክራቲክ ሪፐብሊክ ኮንጎ መዲና ኪንሻሳ ስለተደረገው የሶስቱ ሀገራት የውጭ ጉዳይና የውሃ ሚኒስትሮች ውይይት በሰጡት መግለጫ፥ ካይሮ እና ካርቱም ድርድሩን የማጓተት ስትራቴጂን በመከተላቸው ሰፊ ጊዜ ጠፍቷል ብለዋል።
ደቡብ አፍሪካ ከታዛቢነት እንድትወጣ የቀረበው ሀሳብም የአፍሪካ ህብረትን ክብር የማይመጥን ነው ሲሉ ተናግረዋል። የሀገራቱ የድርድሩን ቅርጽ የመለወጥ እና ከይዘት ይልቅ ሂደት ላይ ማተኮር በኪንሻሳው ስብሰባ ላይ መታየቱንም ነው ሚኒስትሩ የጠቆሙት። በመግለጫቸው ኢትዮጵያ በውጭ ጉዳይ ሚኒስትሯ በኩል ድርድሩ በፍጥነት እንዲጠናቀቅ የአባይን ውሃ ምክንያታዊ እና ፍትሃዊ በሆነ መንገድ የመጠቀም ሉዓላዊ መብቷን እንዳችረዳችም ገልጸዋል። ከትብብር ይልቅ የአንድ ወገን ተጠቃሚነትን ለሚያረጋግጥ ሃሳብ ምንም አይነት ቦታ እንደሌላትም ሚኒስትሩ በመግለጫቸው ያነሱት።
ከግድቡ ውሃ ሙሌትም ይሁን ከአጠቃላይ የግድቡ ሁኔታ ጋር በተያያዘ ጠቃሚ መረጃዎችን ለመለዋወጥ ዝግጁነቷን በመጥቀስም፥ ሁለተኛው ዙር የውሃ ሙሌት በተያዘለት ጊዜ እንደሚካሄድ አስረድተዋል። ከሱዳን በኩል እየተነሱ ያሉ ወቀሳዎችም ምንም አይነት መሰረት የሌላቸው መሆኑን በኪንሻሳው ስብሰባ በስፋት ማስረዳታቸውንም አውስተዋል። ግብፅ ድጋፍ የቸረችው የሱዳን ድርድሩን የማጓተቻ ሀሳቦች ከታዛቢዎች ጋር የተያያዙ እና የድርድሩን ቅርጽ የመለወጥ እንቅስቃሴዎች ተቀባይነት የሌላቸው መሆኑንም ሚኒስትሩ ጠቅሰዋል።
በመጨረሻም ታዛቢ ተብለው የተመረጡት ደቡብ አፍሪካ፣ አሜሪካ እና የአውሮፓ ህብረት አዎንታዊ ሚናቸው ጨምሮ በታዛቢነታቸው እንዲቀጥሉ ስምምነት ላይ መደረሱንም ተናግረዋል። ሃገራቱ የሚያደርጉት የሶስትዮሽ ድርድር በስምንት ሳምንታት እንዲጠናቀቅ ነው የታሰበ ሲሆን፥ ቀጣዩ ድርድርም የዴሞክራቲክ ሪፐብሊክ ኮንጎ ፕሬዚዳንት በሚሰጡት አቅጣጫ ይወሰናል ተብሏል፡፡