ለምን ባለአደራውን እንደምደግፍ #ግርማካሳ

የባለ አደራ ድጋፍ ማህበር በአሜሪካ ተቋቁሟል። ያለፈው ሳምንት በአዉሮፓ ኢትዮጵያዊያን በለደን በነቂስ በሰላማዊ ሰልፍ ለባለአደራ ድጋፍ እንደሰጡ ይታወቃል።

የባለአደራው ንቅናኤ

አንደኛ – የተመሰረተው በአዲስ አበባ አስር ሺሆች በሚቆጠሩ ነዋሪዎች ነው። አገር በቀል እንቅስቃሴ ነው። ዳያስፖራ ያቋቋመው ወይንም በፌስቡክ የተቋቋመ አይደለም።

ሁለተኛ – አላማው እኩልነት ነው። አዲስ አበባ ሕብረብሄራዊነት መልኳን ለማጥፋት፣ በአዲስ አበባ የአንድ ጎሳ የበላይነትን ለመጫን፣ አንዽ ክልል ወይም ጎሳ ልዩ ተጠቃሚ እንዲሆን ለማድረግ የሚንቀሳቀሱ ዘረኛ ቡድኖችን ለመመከት፣ በአዲስ አበባ ሁሉም እኩል ተጠቃሚ፣ ሁሉም፣ ዘራቸውና ሃይማኖታቸው ሳይታይ እኩል እንዲታዩ ለማድረግ የተመሰረተ ነው። የልዩ ጥቅም ሳይሆን የእኩል ጥቅም ተጠቃሚ መርህ ይዞ የሚንቀሳቀስ ነው።

ሶስተኛ፡፡ ዱላና ቆንጨራ ይዞ፣ ሌላውን በማስፈራራትና በሌላው ላይ በመዛት ያል የተመሰረተ አይደለም። በብእርና በሐሳብ ላይ የተመሰረተ ሰላማዊ እንቅስቃሴ ነው። ሰላማዊ በሆነ መንገድ በምርጫ የአዲስ አበባን ህዝብ ጥቅም ለማስጠበቅ የሚሰራ ነው።በአንዳንድ ወገኖች መንፈቀለ መንግስት እየተባለ የሚወራው ወሬ፣ ትኩረት ለማስቀየር የሚወራ መሰረተ ቢስ ተራ ወሬ ነው። ምርጫን የሚፈራ፣ ህዝብ አይደግፈኝም ብሎ የሚፈራ አካል ካልሆነ በቀር ባለ አደራውን ከሰላማዊነት ውጭ በሌላ መፈረጅ ተሸናፊነት ነው።

አራተኛ – የፖለቲካ ፓርቲ አይደለም። ግን ለሕዝብ ቅርብ የሆኑ ፖለቲከኞች እነ ማን እንደሆኑ ለይቶ፣ ለነርሱ ድጋፍ ያደርጋል።

አምስተኛ – ሁሉን አቃፊ፣ ሁሉንም አሳታፊ ነው።፡የዘር ወይንም የሃይማኖት ልዩነት የለም። ጋሞ ሆንክ፣ ጉራጌ፣ ኦሮሞ ሆንክ አማራ፣ ሶማሌ ሆንክ ሲዳማ ዘርህ ምንድን ነው ? የት ነው የተወለድከው ተብለህ አትጠየቅም። ሰው መሆንህ፣ ኢትዮጵያዊ መሆንህ ብቻ በቂ ነው የሚል እምነት ያለው፣ inclusive የሆነ፣ የሰለጠነ አመለካከትን የሚያራምድ ንቅናቄ ነው።


► መረጃ ፎረም - JOIN US