በአሶሳ ዩኒቨርስቲ በተማሪዎች ላይ በደረሰው እና እየደረሰ ባለው ጉዳት ከአብን የተሰጠ መግለጫ- አብን


*****
ከሰሞኑ በቤኒሻንጉል ጉሙዝ ክልል አሶሳ ዩኒቨርሲቲ በተነሳ ግጭት እስከ አሁን ባለን መረጃ መሰረት የ3 ተማሪዎች ሕይወት ማለፉንና ከ40 በላይ ተማሪዎች ቀላልና ከባድ ጉዳት እንደደረሰባቸው፤ ሌሎችም ተማሪዎች በስጋት ላይ ሆነው በተለያዩ የእምነት ተቋማት ተደብቀው እንደሚገኙ ለማወቅ ችለናል፡፡ በተማሪዎች ላይ በደረሰው የአካል ጉዳት እና ሕይወት ማለፍ አብን የተሰማውን ጥልቅ ኃዘን ይገልፃል፡፡ የመንግስት ዩኒቨርሲቲዎች የነገ አገር ተረካቢ ዜጎች ማፍሪያ እንጂ የግጭት ማዕከል መሆን እንደሌለባቸው አብን በፅኑ ያምናል፡፡

በመሆኑም የፌደራል መንግሥቱም ሆነ ዩኒቨርስቲዎች የሚገኙባቸው የክልል መንግስታት በዩኒቨርስቲው ለሚገኙ ተማሪዎች ተገቢ ጥበቃና ከለላ የማድረግ ኃላፊነታቸውን ሊወጡ ይገባል፡፡ ከሰሞኑ በአሶሳ ዩኒቨርስቲ ፀብ ባነሳሱና ለግጭቱ ምክንያት በሆኑ አካላት ላይ አፋጣኝ እርምጃ በመውሰድ ተማሪዎች ትምህርታቸውን በተረጋጋ ሁኔታ እንዲማሩ የሚመለከታቸው አካላት ሕግ የማስከበር ኃላፊነታቸውን በትክክል ሊወጡ እንደሚገባ አብን ያሳስባል፡፡

መሰል የግጭት አዝማሚያዎች በሀሮማያ እና በሌሎችም አንዳንድ ዩኒቨርስቲዎች ስላሉ መንግስት ጉዳት ከመድረሱ በፊት ሕግ የማስከበር እና ለተማሪዎች ጥበቃ የማድረግ ተግባሩን በተገቢው ሁኔታ ሊወጣ እንደሚገባም አብን በአንክሮ ያሳስባል። በተማሪዎች መካከል ግጭት በተነሳ ቁጥር የአማራ ተማሪዎች በተለዬ መልኩ የዘር ተኮር ጥቃት ሰለባ እየሆኑ መሆናቸውን በመረዳት የአማራ ብሔራዊ ክልላዊ መንግሥትም የዜጎች ደኅንነት የሚጠበቅበትን እና ችግሩ በዘላቂነት የሚፈታበትን መንገድ ማመቻቸት እንደሚገባው እያስገነዘብን የሚመለከታቸው አካላት አማራ ተማሪዎች ላይ የሚደርሰውን ጥቃት ማስቆም የማይችሉ ከሆነ ከሕዝባችን ጋር በመሆን የራሳችንን አማራጭ ለመውሰድ የምንገደድ መሆኑን በጥብቅ እናስጠነቅቃለን። የአማራ ወላጆች በሰላም ወደ ከፍተኛ ትምህርት የላኳቸው ልጆቻቸውን ሬሳ ሲቀበሉ እስከመቼ ይዘልቃሉ? መላው አማራስ ለትምህርት ወደ ዩኒቨርሲቲ የገቡ ወጣቶቹ በሞቱ ቁጥር እስከመቼ ነፍስ ይማር እያለ ይዘልቃል?

አብን ለሟች ተማሪ ቤተሰቦች መጽናናትን ይመኛል!

አንድ አማራ ለሁሉም አማራ፥ሁሉም አማራ ለአንድ አማራ!

የአማራ ብሔራዊ ንቅናቄ –አብን
ኅዳር 12/2011ዓ.ም
አዲስ አበባ፥ሸዋ፣ ኢትዮጵያ


► መረጃ ፎረም - JOIN US
► MEREJA TV YOUTUBE CHANNEL - SUBSCRIBE