የደቡብ ምዕራብ ህዝበ ውስኔ መራዘም ቅሬታ አስነሳ

የደቡብ ምዕራብ ህዝበ ውስኔ መራዘም ቅሬታ አስነሳ።

የደቡብ ምዕራብ ህዝበ ዉሳኔ የመራዘሙን ውሳኔ እንደማይቀበሉ የካፋ እና የዳውሮ ዞኖች ገለጹ።

የኢትዮጵያ ብሄራዊ ምርጫ ቦርድ የደቡብ ምዕራብ ህዝበ ዉሳኔ እንዲራዘም መወሰኑን ተከትሎ ከካፋ ዞን ብልጽግና ፓርቲ ጽ/ቤት ዉሳኔውን ተቃውሟል።

የፓርቲው ጽ/ቤት ኃላፊ አቶ እንዳሻው ከበደ በሰጡት መግለጫ ”ለህዝበ ውሳኔው አስፈላጊዉ ቅድመ ዝግጅት እየተጠናቀቀ ባለበት ወቅት እንዲራዘም መወሰኑ ከዞናችን አኳያ ምንም ዓይነት መሠረታዊ ምክንያት የሌለዉ” ሲሉ ገልጸዋል።

ቦርዱ ጉዳዩን በድጋሚ በማጤን የህዝበ ዉሳኔዉ ቀደም ሲል በተያዘለት ሰኔ 14/2013 እንዲካሔድ እንዲያደርግ እንጠይቃለን ሲሉም አክለዋል።

የካፋ ዞን ም/ዋና አስተዳዳሪ አቶ በላይ ተሠማ በበኩላቸው ”ይህንን ህዝበ ውሳኔ የሚያስተባብሩ አመራሮች እንዲሁም የዞኖቹና የልዩ ወረዳው ከፍተኛ አመራሮች በጉዳዩ ላይ ሳይወያዩበት ብሄራዊ ምርጫ ቦርዱ በራሱና አሳማኝ ባልሆነ ምክንያት ህዝበ ውሳኔውን ማራዘሙ ተገቢነት እንደሌለው የዞኑ መንግሥት ያምናል” ሲሉ ገልጸዋል።

የዳውሮ ዞን ደግሞ ዛሬ በሰጠው መግለጫ የህዝበ ውሳኔው መራዘም ”የዞኑን ነባራዊ ሁኔታ ፈፅሞ ያላገናዘበ እንዲሁም ለሃገረ መንግስት ግንባታ የዜግነት ግዴታቸዉን ለመወጣት በሞራልም ሆነ በስነልቦና የተዘጋጁትን ህዝባችንን ቅሬታ ዉስጥ ያስገባቸዉ ሆኖ አግኝተነዋል” ብሏል።

ዳውሮ ዞን ምርጫ ቦርድ ለጳጉሜ 1 ያዘዋወረውን የድምፅ መስጫ ቀን ቀድሞ በተያዘለት ቀን ሰኔ 14 እንዲያደርግ አሳስቧል።