አትሌት ሃይሌ ገ/ሰላሴ ፌስቡክን ለመክሰስ ማሰቡ ተሰማ

ፌስቡክን ለመክሰስ እያሰብኩ ነው- አትሌት ሃይሌ ገ/ሰላሴ

(ኤፍ ቢ ሲ) ፌስቡክን ለመክሰስ እያሰበ መሆኑን አትሌት ሀይሌ ገብረስላሴ ለፋና ብሮድካስቲንግ ኮርፖሬት አስታወቀ፡፡

ሻለቃ አትሌት ሃይሌ ገብረስላሴ ባለፉት ዓመታት በኢትዮጵያ ውስጥ የሚስተዋሉ የጸጥታ ችግሮች የከፋ ጉዳት እንዲያደርሱ የማህበራዊ የትስስር ገጾች በተለይም ፌስቡክ ትልቅ ድርሻ እንደነበረው ገልጿል፡፡

የኢትዮጵያ መንግስት ፌስቡክ እያደረሰ ላለው ጥፋት የማይከስ ከሆነ እኔ መክሰሴ አይቀርም ያለው ሀይሌ ሃገር እየተጎዳ ነው፤ ህዝብም እየሞተ ነው ብሏል፡፡

በጥቂት ቀናት ውስጥ የበርካቶች ህይወታቸውን ማጣታቸውን የገለፀ ሲሆን ይህም ፌስቡክን ለመጠየቅ በቂ ነው በማለት ተናግሯል፡፡

ፌስቡክን ለትግል እና ለነጻነት ድምጽ ማሰሚያ አውለነዋል የሚል ሃሳብ ቢነሳም፤ አላስፈላጊ መስዋዕትነት ሊያስከፍል እንደማይገባና ጥነቃቄ ሊደረግ እንደሚገባ አሳስቧል፡፡

ማንም ሰው ውሎ አድሮ ለሰራው ጥፋት ከተጠያቂነት አያመልጥም ሲል ነው የተናገረው፡፡

አትሌት ሃይሌ ከፌስቡክ ባሻገር ኢትዮጵያ ውስጥ የተከፈቱ ሚዲያዎች በጥንቃቄ መስራት እንዳለባቸው አሳስቧል።

በሃገር ውስጥም ሆነ በውጭ የሚገኙ ኢትዮጵያውያን ወደ ደጋፊዎቻቸው የሚያደርሷቸውን ምስሎች እና ጽሁፎች ላይ ጥንቃቄ ሊያደርጉ እንደሚገባም ተናግሯል፡፡

አትሌት ሀይሌ ሌላ አገር የተፈጠሩ እዚህ አገር እንደተፈጠሩ፣ ሌላ ሃገር የተቆረጡ እጆችና እግሮች እዚህ አገር እንደተቆረጡ፣ ሌላ አገር የተቃጠሉ ቤቶች እና ንብረቶች እዚህ አገር እንደተቃጠሉ አድርጎ ለጣጥፎ ማቅረብ፤ አድራጊውን ሰው ኋላ ላይ ዋጋ ያስከፍለዋል።’’ ብሏል፡

አሁን ቁጭ ብሎ ቢያይ ነገ ከተጠያቂነት አያመልጥም ሲል በዚህ ተግባር የተሰማሩ አካላት ጥንቃቄ እንዲያደርጉ አሳስቧል።


► መረጃ ፎረም - JOIN US