የገባው የጸጥታ ኀይል እንዲወጣ ተደርጎ በኦነግ ሸኔ ጥቃት ተፈጽሟል – ከምስራቅ ወለጋ ሸሽተው ያመለጡ ዜጎች

በምሥራቅ ወለጋ ዞን የታጠቁ የኦነግ ሸኔ ቡድኖች ባደረሱት ጥቃት የንጹሃን ህይወት አለፈ፡፡
በምሥራቅ ወለጋ ዞን ኪረሙ ወረዳ ሀሮ ቀበሌ የኦነግ ሸኔ ታጣቂዎች በአማራዎች ላይ በከፈቱት ጥቃት የንጹሃን ህይወት ማለፉን እና ንብረት መውደሙን የጥቃቱ ሰለባ ቤተሰቦች ለአሚኮ ገልጸዋል፡፡ በአካባቢው በተደጋጋሚ እየደረሰ ባለው ጥቃት ሸሽተው እንደመጡ የገለጹት የተጠቂ ቤተሰቦች ከትናንት እኩለ ቀን ጀምሮ ደግሞ በቤተሰቦቻቸው ላይ የሸኔ ታጣቂዎች ጥቃት መፈጸማቸውን ነግረውናል፡፡
ከዚህ በፊት የኦነግ ሸኔ ታጣቂዎች በዞኑ ውስጥ በሚኖሩ አማራዎች ላይ በከፈቱት ጥቃት የንጹሃን ዜጎች ሕይወት ማለፉንና በርካታ ንብረት መውደሙን አስታውሰው ትናንት ደግሞ ከዚህ በፊት ከተለያዩ አካባቢዎች ተፈናቅለው በአንድ ላይ በሚኖሩባት የሀሮ ቀበሌ በተከፈተ ጥቃት ንብረት መውደሙን እና የንጹን ህይወት ማለፉን ነው የገለጹልን፡፡
ከዚህ በፊት ወደ አካባቢው የጸጥታ ኀይል እንዲገባ ተደርጎ ችግሩ ቆሞ እንደነበር ነግረውናል፡፡ ይሁን እንጅ የገባው የጸጥታ ኀይል በመውጣቱ ጥቃት ተፈጽሟል ብለዋል፡፡ በዚህም የንጹሃን ህይወት አልፏል፣ ንብረት ወድሟል፤ ቤት ተቃጥሏል፤ የተረፈውም በተደራጁ ቡድኖች መዘረፉን ተናግረዋል፡፡ ችግሩ እንዲፈታ ከዚህ በፊት በየደረጃው ለሚገኙ የመንግሥት አካላት ጥያቄውን ማቅረባቸውን አንስተዋል፡፡
መንግሥት የሀገር መከላከያ ሠራዊትን ወደ አካባቢው በማስገባት ከጥቃት የተረፉ ቤተሰቦቻቸውን እንዲታደጋቸውም ጠይቀዋል፡፡ ጉዳዩን በተመለከተ ምላሽ እንዲሰጡን ለምሥራቅ ወለጋ ዞን አስተዳዳሪ፣ ለዞኑ ፖሊስ መምሪያና ለጸጥታ ዘርፍ ኀላፊዎች ደውለን ስልካቸው መነሳት አልቻለም፡፡ በጉዳዩ ላይ የዞኑን የሥራ የኀላፊዎችና የኦሮሚያ ክልል ፖሊስ ኮሚሽንን ምላሽ ይዘን ለመቅረብ ጥረታችን እንቀጥላለን።