መፈናቀሉ የቀጣይ ዓመት ኑሯቸውንም አደጋ ላይ እንደሚጥለው ከቤኔሻንጉል የተፈናቀሉ ወገኖች ተናገሩ

ሕዝቡ ስጋት ላይ ሆኖ እየተፈናቀለ አመራሩ ከማሰቆም ይልቅ በዝምታ የተመለከተዉ ማፈናቀሉን ስለሚፈልገዉ እንደሆነም ነው የተናገሩት፡፡ በቆዳ ቀለማቸው ምክንያት ልዩነት እና አድሎ እየተፈጸመ መሆኑንም በውይይታቸው አንስተዋል፡፡
በነጻነት ቀስት እየተሰራ መሆኑ እና ቀስት ይዞ መንቀሳቀስ መፈቀዱም ተገቢ እንዳልሆነ ነው የተናገሩት፡፡ ከቀበሌ እስከ ክልል ያሉ አመራሮች ስራቸውን በትክክል በመስራት ግጭቶችን ቀድመው ማስቀረት እንዳለባቸውም ጠይቀዋል፡፡

‹‹አሁን ሰው ተፈናቀለ፤ በሚቀጥለዉ ዓመት ደግሞ ዛሬ እርሻ ስላላረስን ረሃብ ይመጣል፤ በዚህ ደግሞ ሁሉም ተጎጂ ነው›› በማለትም የወቅቱን መፈናቀል እና ግጭት አሳሳቢነት አስገንዝበዋል፡፡ ‹‹ጉሙዝና አማራ አልተጣሉም፤ የሁለቱ ክልል መንግስታት በጋራ ካልስሩ በሚቀጥለዉ ዓመት ግብርናም፤ ምርትም፤ ኑሮም አይኖርም›› ብለዋል ተወያዮቹ፡፡

‹‹አይዟችሁ የሚሉ፣ ቀስት የሚያቀብሉ አመራሮች አሉ፤ በቁጥጥር ስር ይዋሉ›› ሲሉም ጠይቀዋል፡፡ በግጭቱ ከሁለቱም ሕዝቦች ሕይዎታቸውን ማጣታቸውን የተናገሩት ነዋሪዎቹ እርቀ ሰላሙ ለይስሙላ መሆን እንደሌለበትም አንስተዋል፡፡

የአማራ ክልል ርዕሰ መስተዳድር የኢኮኖሚ አማካሪ አቶ አየነዉ በላይ አሁንም ሰላሙ እንዳልተረጋገጠ እና ገና የሚቀሩ ተግባራት እንዳሉ ተናግረዋል፡፡ የአማራ ሕዝብ እንዲደራጅ የሚፈለገው እየደረሰበት ያለውን ግፍ ለመከላከል እንጂ ለማጥቃት እንዳልሆነ መገንዘብ እንደሚገባም አስረድተዋል፡፡ መደራጀቱ ለማንም ስጋት እንደማይሆንም ነው ያስረዱት፡፡ ሁሉም በሚኖርበት አካባቢ ሰላምና ደኅንነቱ ተጠብቆ መኖር እንዳለበትም አሳስበዋል፡፡ ከዚህ ውጭ የሚፈጸሙ ተግባራት የተወገዙ መሆናቸውንም ተናግረዋል፡፡

የውይይቱ ዋና ዓላማም ተፈናቃዮች ደኅንነታቸዉ ተጠብቆ የእርሻ ጊዜው ሳያልፍ ወደ ቀያቸው እንዲመለሱ ለማድረግ መሆኑን አቶ አየነው ተናግረዋል፡፡ ይህንን ለማድረግ በየአካባቢው ያለው ግድያ እና የጸጥታ ስጋት መቀረፍ እንዳለበትም ነው ያሳሰቡት፡፡

የቤኔሻንጉል ጉሙዝ ክልል ምክትል ርዕሰ መስተዳድር አቶ አድጎ አምሳያ በበኩላቸው ግጭቱ ‹‹አስፈሪ ነዉ፤ አጥፊዎቹን ለህግ እናቀርባለን፤ ማንቡክ ላይ ተደራጅተዉ ዜጎች ላይ ግድያ የፈጸሙ እና የተሰወሩ ቡድኖች አሉ፤ እነሱንም በቁጥጥር ስር አውለን ለህግ እናቀርባለን›› ብለዋል፡፡

በቂም በቀል መገዳደል መቆም እንዳለበት እና ሁሉም ግጭቱን ለማስቆም መስራት እንዳለበትም ነው ያሳሰቡት፡፡ ለሞት፣ ለአካል ጉዳትና ለንብረት ውድመት እንዲሁም ለመፈናቀል ምክንያት የሆነው ስውር ደባ ከፖለቲካ አመራሮች ውጪ በገለልተኛ ባለሙያዎች እየተጠና መሆኑም ተመላክቷል፡፡