የሪፖርተር ጋዜጣ ዜና እና የዞን ዘጠኙ ጦማሪ በፍቃዱ ዘሃይሉ ስለ ሰማያዊ ፓርቲ እና ስለተባረሩት ኣባሎቹ

፪ኛ) ታስሯል።

ዮናታን ራሱን ካሰናበተ በኋላ፣ መንግሥት ሲያፍነው ከመንግሥት ዕኩል ሥም ሰጥቶ መወንጀሉ ሰማያዊን ምን ያክል ያስኬደዋል? (የሞራል ጥያቄ ነው) በዚህ ዓይነት እኮ መንግሥት ዮናታን ላይ የሰማያዊን መግለጫ አምጥቶ ሊከሰው ይችላል። ዮናታን (እና እያስጴድ፣ እና ሌሎችም…) ሰማያዊ ከተመሠረተበት አቋም የማፈንገጥ አዝማሚያ አሳይተዋል። ሆኖም፣ የሰማያዊ ፕሮግራም የማይጠየቅ ቅዱስ ቃል አይደለም። ሰማያዊ ፓርቲ የገዛ ልጆቹን በሐሳብ ረትቶ ውስጡ ማቆየት ካልቻለ አዳዲሶችን እንዴት ማምጣት ይችላል? “ማንም የቆመ ቢመስለው እንዳይወድቅ ይጠንቀቅ” እንዲል የክርስቲያኖች መጽሐፍ።

የዮናታንን የመጨረሻ አቋም ፌስቡክ ላይ ሳነብ ነበር። ዮናታን ከጠባብ ኢትዮጵያዊ ብሔርተኝነት ሌሎችንም (የተገለሉትን ወይም እንደተገለሉ የሚሰማቸውን) አካታች ወደሆነው ሰፊ ኢትዮጵያዊ ብሔርተኝነት ለመሸጋገር እየተፍጨረጨረ ነበር። ሙሉ ለሙሉ አልተሳካለት ይሆናል። ነገር ግን በቀና ልቦና አንድ አቋም እንደቀኖና ሳይይዝ ትክክለኛ መንገድ ለማግኘት እየተፍጨረጨረ እንደነበር እወራረድለታለሁ።

ሰማያዊ ፓርቲ አባሎቹም ይሁኑ ሌሎች የሚያነሱበትን እንከን መርምሮ ከጥያቄዎቹ በላይ ሆኖ መገኘት ሲገባው፣ በኔ እይታ የወሰደው እርምጃ የሚያሳንሰውን ነው። የወሰደው እርምጃ በሥነ ስርዓት ደንቡ ተገቢ ሊሆን ይችላል። የሥነ ስርዓት ደንቦች የሐሳብ ብዝኃነቶች የሚገድቡ ከሆኑ ግን ፍትሓዊ ርትዓዊ አይደሉም። ዮናታን በሰማያዊ የተወነጀለው ሐሳቡን በመግለፁ ነው። መንግሥትም ዜጎቹን የሚከሰው በተመሳሳይ አጀንዳ አለባብሶ ነው።

ሰማያዊ ፓርቲ የአሁኖቹ መሪዎች ሲተቹ ቅሬታ የሌለበትን ያክል የቀድሞ መሪዎችም ሲተቹ፣ ቢያንስ እንደነፃነት መቀበል ነበረበት። እንደእውነቱ ሁላችንም እየከፈልን ያለነው የቀድሞ አባቶቻችንን ዕዳ ነው። ጣጠኛ አገር አስረከቡን እንጂ ጣጣዋ ያለቀ አገር አላስረከቡንም። መግባበት በሌለበት የቀድሞ ታሪክ ላይ የፓርቲ አባላት ቢሳሳቱ እንኳን የመታረም ዕድል ነበር የሚያስፈልጋቸው፤ «የቀድሞ ወዳጅክን በምን ቀበርከው ቢሉ በሻሽ፣ የኋለኛው እንዳይሸሽ» አይደለም ከነተረቱ?!