የኢህአዴግ ካድሬዎች በሕዝቡና በመድረክ አባላት ላይ እየወሰዱ ያሉትን ኢ-ሰብአዊ እርምጃ አጠናክረው ቀጥለውበታል፡፡

በሌላ በኩል ደግሞ በኦሮሚያ ክልላዊ መንግስት በሚገኙ ዘጠን ከተሞች የሚኖሩ 5,801 አባወራዎችና እማወራዎች ሕገወጥ ቤት ሠርታችኋል በምል ሰበብ መኖሪያ ቤታቸው ፈርሶ ከነቤተሰቦቻቸው በክረምቱ ዝናብ ሜዳ ላይ እንዲበተኑ ተደርገዋል፡፡ በቡራዩ፣ በሰበታ፣ በሱልልታ፣ በዱከም፣ በገላን፣ በብሾፍቱ፣ በለገጣፎ፣ በነቀምት እና በአጋሮ ከተማ ነዋሪ ሆኑት እነዚሁ ዜጎች እየተፈጸመባቸው ያለው ኢሰብአዊ ተግባር እንዲቆም ለሚመለከታቸው የመንግሥት አካላት አቤቱታዎችን ቢያቀርቡም ሰሚ እንዳላገኙና በበርካታ ዜጎች ላይም የእስራትና የገንዘብ ቅጣት እንደተወሰነባቸው ለማወቅ ተችሎአል፡፡

ይህ በእንዲህ እንዳለ በሜታ ሮቢ ወረዳ የዋራቦ ቀበሌ ነዋሪ የኦፌኮ/መድረክ አባላት የሆኑ 14 ወጣቶች በ2007 ምርጫ ወቅት ኢህአዴግን በመቃወም ለመድረክ ቅስቀሳ አካሄዳችኋል በምል የበቀል እርምጃ ማናቸውንም መንግሥታዊ አገልግሎት እንዳያገኙና ከመከሰስ በስተቀር ለየትኛውም መሥሪያ ቤት የሚያቀርቡት ክስ ተቀባይነት እንዳይኖረው በቀበሌው አስተዳደርና ማሕበራዊ ፍርድ ቤት ተወስኖባቸዋል፡፡ በሁለቱ መሥሪያ ቤቶች ማሕተምና አቶ ካቤ ኃይሉ በሚባሉ የቀበሌው ሊቀመንበር ፊርማ ተረጋግጦ ለተለያዩ መንግሥታዊ አካላት በተጻፈውና በተሰራጨው በዚሁ ደብዳቤ ከላይ የተጠቀሰው ውሳኔ የተላለፈባቸው ወጣቶች 1- ወጣት ጥበቡ ላዬ፣ 2- ወጣት ፍቅር ዳባ፣ 3- ወጣት ቃጄላ በቀላ፣ 4- ወጣት ጥላሁን ለገሰ 5- ወጣት ደጀኔ ድርብሳ፣ 6- ወጣት መገርሳ በቀለ፣ 7- ወጣት ድርባ ኦላና፣ 8- ወጣት ፋይሳ ኦላና፣ 9- ወጣት አስረስ ኦላና፣ 10- ወጣት ጋዲሳ ቶሎሳ፣ 11- ወጣት ነጋሳ ቶሎሳ፣ 12- ወጣት ዳባ መልካ፣ 13- ወጣት ጌቱ ቀጄላ እና 14- ወጣት ምልክሳ ፉፋ ናቸው፡፡ ይኼው የዜጎችን ሕገመንግሥታዊ መብት የሚገፍ ሕግ ወጥ ደብዳቤ የተጻፈላቸው የመንግሥት አካላት የዜጎቹን መብት ለማስከበር እስከአሁን የወሰዱት የእርምት እርምጃም እንደለለም ለማወቅ ተችሎአል፡፡

ከዚህም ሌላ በኢሉባቦር ዞን ዳሪሙ ወረዳ ነዋሪ የሆኑ በምርጫው መድረክ ደጋፊ የነበሩ 10 ዜጎች በመንግስት ላይ ሕዝብን አነሳስታችኋል በምል የፈጠራ ክስ ከ1 እስከ 2 ዓመት እስራት በዳሪሙ ወረዳ ፍርድ ቤት ሲወሰንባቸው ሌሎች 10 ዜጎች ደግሞ ከ600 እስከ 1500 ብር ድረስ የገንዘብ ቅጣት ተወስኖባቸዋል፡፡