በመቐለ ከተማ የቦንብ ፍንዳታ ደረሰ

በመቐለ ከተማ ትናንት ኅዳር 18 ምሽት 4 ሰዓት ተኩል ገደማ ልዩ ስሙ “ዓዲ ሓቂ” በሚባል አካባቢ የቦንብ ፍንዳታ መድረሱን የከተማዋ ሰላምና ጸጥታ ቢሮ አስታወቀ። የከተማዋ ሰላምና ጸጥታ ጽሕፈት ቤት ሃላፊ ረድሀኝ ፍስሃ፣ “ሕዝብን ለማሸበር ተልዕኮ የተሰጣቸው የጥፋት ኃይሎች” ሲል የጠራቸው አካላት የቦንብ ጥቃቱን መፈጸማቸውን እና ሆኖም የቦንብ ፍንዳታው በሰው ወይም በንብረት ላይ ጉዳት እንዳላደረሠ መናገራቸውን የመቐለ ኤፍኤም ሬድዮ ዘግቧል። በቦንብ ጥቃቱ የከተማዋ ነዋሪዎች መሸበራቸውን የገለጸው ጽህፈት ቤቱ፤ የጥቃቱ ዓላማ “ሁከት እና ብጥብጥ ለመፍጠር ሆን ተብሎ እና ታስቦበት የተፈጸመ ነው” ብሏል። ጽሕፈት ቤቱ፣ የጸጥታ አካላት የቦንብ ጥቃቱን ፈጻሚዎች በቁጥጥር ስር ለማዋል በጋራ እየሠሩ መሆኑንም ገልጧል። መሰል ጥቃቶችን በማቀነባበር ተግባር ላይ የተጠመዱ ግለሰቦች፤ በከተማዋ ውስጥ ከፍተኛ ችግር እንደተፈጠረ በማስመስል ሃሰተኛ መረጃዎችን እያሰራጩ ነው በማለት የከሠሠው ጽሕፈት ቤቱ፣ ሆኖም ከቦንብ ጥቃቱ ውጪ ሌላ አንዳችም ችግር አልተፈጠረም ብሏል።