ዶናልድ ትራምፕ የሦስተኛው ዓለም አገራት ዜጎች በዘላቂነት ወደ አሜሪካ እንዳይገቡ አግደዋል

የፕሬዝዳንት ዶናልድ ትራምፕ አስተዳደር፣ የሦስተኛው ዓለም አገራት ዜጎች በዘላቂነት ወደ አሜሪካ እንዳይገቡ ለማገድ መወሰናቸውን ትናንት አስታውቀዋል። የፕሬዝዳንቱ አስተዳደር፣ ኤርትራ፣ ሶማሊያ እና ሱዳንን ጨምሮ አሜሪካ ለ19 አገራት የውጭ ዜጎች የሠጠቻቸውን የመኖሪያ እና የሥራ ፍቃዶች በድጋሚ ሊመረምር መሆኑንም ገልጧል። ፕሬዝዳንት ትራምፕ አሜሪካ ውስጥ የሚኖሩ የእነዚህ አገራት ዜጎች የያዙት የመኖሪያ እና የሥራ ፍቃድ በድጋሚ እንዲመረመር ትዕዛዝ ያስተላለፉት፣ አንድ አፍጋኒስታናዊ ስደተኛ ረቡዕ’ለት ዋይትሃውስ አቅራቢያ ሁለት የአሜሪካ ብሄራዊ ዘብ አባላትን ተኩሶ ማቁሰሉን ተከትሎ ነው። የፕሬዝዳንቱ አስተዳደር ባለስልጣናት የቀድሞው ፕሬዝዳንት የጆ ባይደን አስተዳደር ያጸደቃቸውን ሁሉንም የጥገኝነት ጥያቄዎች በድጋሚ እንደሚመረምሩም ተገልጧል። በቀድሞው ፕሬዝዳንት ባይደን አስተዳደር ወቅት የገቡ ሁሉም ስደተኞች የቋሚ መኖሪያ ፍቃድ ጥያቄዎችም ለጊዜው እንዲቆሙ ተደርጓል።