ብልጽግና ፓርቲ ቀይ ባሕር ዳርቻ ላይ የባሕር ኃይል ጣቢያ የማቋቋም ፍላጎቱ “የደኅንነት አመክንዮም” ሆነ “የደኅንነት ትሩፋት” የለውም ( ማስታወቂያ ሚንስትር )

የኢትዮጵያው ገዥ ብልጽግና ፓርቲ ቀይ ባሕር ዳርቻ ላይ የባሕር ኃይል ጣቢያ የማቋቋም ፍላጎቱ “የደኅንነት አመክንዮም” ሆነ “የደኅንነት ትሩፋት” የለውም ሲሉ የኤርትራው ማስታወቂያ ሚንስትር የማነ ገብረመስቀል አጣጣሉ። የጉዳዩ ዋና ውዝግብ የባሕር በር አይደለም ያሉት የማነ፣ ኢትዮጵያ ለንግድ አገልግሎት አዋጭ የሆኑ ስምምነቶች ላይ ለመድረስ በርካታ አማራጮች አሏት ብለዋል። የማነ፣ “የራስን የባሕር በር ማግኘት” የሚባለው አጀንዳ ግን “አደገኛ” እና “የኢትዮጵያ ጎረቤቶችን ሉዓላዊነት እና የግዛት አንድነት የሚጥስ” መሆኑን ገልጸዋል። የማነ፣ ሌላኛው የብልጽግና ፓርቲ አስገራሚ የራስን የባሕር በር ጥያቄ፣ ቀይ ባሕር ዳርቻ ላይ የባሕር ኃይል ጣቢያ ለማቋቋም ፍላጎት ያለው መሆኑን በተደጋጋሚ መግለጡ ነው በማለት ተችተዋል። የንግድ ልውውጡን በቀይ ባሕር በኩል የሚያደርግ ማንኛውም አገር ቀይ ባሕር ዳርቻ ላይ የባሕር ኃይል ጣቢያ የማቋቋም ሕጋዊ መብት ይኖረዋል ማለት እንዳልሆነም የማነ ጠቁመዋል። ብልጽግና ፓርቲ የውጭ ወታደራዊ አዛዦች በአዲስ አበባ አንዳንድ ጊዜ የሚያደርጓቸውን “ተራ” ጉብኝቶች አጣሞ የማቅረብ አሰልቺ አካሄድ ጀምሯል በማለት የማነ አያይዘው የተቹ ሲሆን፣ ፓርቲው የአሜሪካው የአፍሪካ ወታደራዊ ዕዝ እንዲሁም የጣሊያን ባሕር ኃይል እና የፈረንሳይ ጦር ኃይል አዛዦች በኢትዮጵያ ያደረጓቸው ጉብኝቶች የባሕር በር የማግኘት ፍላጎቱን የሚደግፉ አስመስሎ አቅርቧቸዋል ብለዋል።