ከቂሊንጦ ማረሚያ ቤት ዛሬ በዋስ የተለቀቁ የፖለቲካ እስረኞች በር ላይ በድጋሜ በፖሊስ ተይዘው ወዳልታወቀ ስፍራ ተወሰዱ

(መሠረት ሚድያ)- ለሁለት ዓመታት ያህል በቂሊንጦ እስር ቤት ውስጥ የቆዩት የቀድሞው የተወካዮች ምክር ቤት አባል አቶ አብዱረሕማን አሕመዲን፣ አቶ ግዛቸው ታምር እና አቶ መኮንን ደሳለኝ የተባሉ ተጠርጣሪዎች የፌደራል ከፍተኛ ፍርድ ቤት ልደታ የፀረ-ሽብር ወንጀል ምድብ ችሎት እያንዳንዳችው በሁለት መቶ ሺህ ብር ዋስ እንዲፈቱ ትናንት ሕዳር 18 ቀን 2018 ዓ.ም ብይን ሰጥቶ ነበረ።

ለፋኖ ድጋፍ መስጠት በሚል የተጠረጠሩት ግለሰቦቹ የተጠየቁትን የሁለት መቶ ሺህ ብር ዋስ አስይዘው ዛሬ ሕዳር 19 ቀን 2018 ዓ.ም እኩለ ቀን ሲሆን ከቂሊንጦ ማረሚያ ቤት ሲወጡ የፌደራል ፖሊሶች እና ሲቪል የለበሱ ግለሰቦች በኃይል በማስገደድ አምቡላንስ ውስጥ አስገብተው ይዘዋቸው እንደሄዱ የዐይን እማኞች ለመሠረት ሚዲያ ተናግረዋል።

አቶ አብዱረሕማን አሕመዲን

የዐይን ምስክሮቹ እንደገለፁት ሦስቱም እስረኞች እድሜያቸው የገፋ ሲሆን አንደኛው እስረኛ በሰዎች ተደግፎ ከእስር ቤት ሲወጣ እንደተመለከቱ ገልፀዋል።

የእስረኛ ቤተሰቦች ደግሞ ለሚድያችን እንደገለፁት አዲስ አበባ ሜክስኮ በሚገኘው የፌደራል ፖሊስ ወንጀል ምርመራ ቢሮ ድረስ በመሄድ ቢጠይቁም “አየሁ የሚል የለም” ሲሉ ተናግረዋል።

የቀድሞው የኢዴፓ እና የተወካዮች ምክር ቤት አባል አቶ አብዱረሕማን አሕመዲን በቅርቡ ከባድ ቀዶ ሕክምና የተደረገላቸው መሆኑን እና ይህንኑ የጤና ሁኔታቸውን ምክንያት ማድረግ የከፍተኛው ፍርድ ቤት በውጭ ሆነው ጉዳያቸውን እንዲከታተሉ በዋስ እንደለቀቃቸው የገለፁት ምንጮቻችን ዛሬ ከማረሚያ ቤት ሲወጡ ታፍነው መወሰዳቸውን አስረድተዋል።

ቀደም ሲል በተመሳሳይ መልኩ ተጠርጥረው የከፍተኛው ፍርድ ቤት በሁለት መቶ ሺህ ብር ዋስ የለቀቃቸውን አቶ ሚካኤል መላክ የተባሉ ተጠርጣሪ ፖሊስ በር ላይ በኃይል አስገድዶ ይዟቸው እንደወሰዳቸው መዘገባችን ይታወሳል።

-መሠረት ሚድያ-