Posts

በወልቃይት የአማራ ማንነት ጥያቄ የመፍትሔ አፈላላጊ ኮሚቴ አባላት ክስ የዓቃቢ ህግ ምስክሮች ሳይቀርቡ ቀረ!!!

በወልቃይት የአማራ ማንነት ጥያቄ የመፍትሔ አፈላላጊ ኮሚቴ አባላት ክስ የዓቃቢ ህግ ምስክሮች ሳይቀርቡ ቀረ!!!


(በሰማያዊ ብሔራዊ ሸንጎ የህዝብ ግንኙነት ንዑስ ኮሚቴ)
===========================
በአማራ ክልል በ2008 ዓ.ም በተነሳው ህዝባዊ ተቃውሞ ለሰው ህይወት መጥፋትና ለንብረት መውደም ምክንያት ናቸው በማለት የፌደራል ጠቅላይ ዓቃቢ ህግ የሽብር ክስ የመሰረተባቸው በወልቃይት የአማራ ማንነት ጥያቄ የመፍትሔ አፈላላጊ ኮሚቴ አምስት አባላት ማለትም አቶ መብራቱ ጌታሁን፣አቶ አታላይ ዛፌ፣አቶ አለነ ሻማ፣አቶ ጌታቸው አደመ አና አቶ ነጋ ባንቲሁን ክስ ዓቃቢ ህግ ምስክሮችን ሳያቀርብ ቀረ፡፡የፈደራል ከፍተኛ ፍርድ ቤት ልደታ ምድብ 4ኛ ወንጀል ችሎት ሚያዚያ 3 ቀን 2009 ዓ.ም በዋለው ችሎት የዓቃቢ ምስክሮችን ለመስማት ለዛሬ ግንቦት 9 ቀን 2009 ዓ.ም ቀጠሮ ይዞ የነበረ ቢሆንም ምስክሮችን አንዲያቀርብ ትዕዛዝ የተሰጠው የትግራይ ክልል ምዕራባዊ ዞን ፓሊስ ምስክሮቹን አላቀረበም፡፡
የዞኑ ፓሊስ ለፍርድ ቤቱ በላከው ደብዳቤ ምስክሮቹን ለማቅረብ እልህ አስጨራሽ ትግል እንዳደረገና ለዛሬ ማቅረብ እንዳልቻለ ነገር ግን ሁለት ምስክሮች ለነገ ለግንቦት 10 ቀን 2009 ዓ.ም ማቅረብ እንደሚችል ተጨማሪ 11 ምስክሮችን ደግሞ ለግንቦት 14 ቀን 2009 ዓ.ም ማቅረብ እንደሚችል ገልፆ ለግንቦት 14 ቀን 2009 ዓም ተለዋጭ ቀጠሮ እንዲሰጠው ጠይቋል፡፡
በጉዳዩ ላይ አስተያየቱን የተጠየቀው ዓቃቢ ህግ መዝገቡ ለዛሬ መቀጠሩን እንደማያውቅና ምስክሮችን በተመለከተም ምንም መረጃ እንደሌለው ተናግሯል፡፡
የተከሳሾች ጠበቆች በበኩላቸው ዓቃቢ ህግ የደንበኞቻቸውን ጉዳይ በቸልታ ማየቱ ተገቢ እንዳልሆነ፣ ምሰክሮቹም በተቆራረጠ ሁኔታ መቅረባቸው ተከሳሾችን ማጉላላት እንደሆነ፣ ምስክር ለማቅረብ ከአንድ ወር በላይ ጊዜ መሰጠቱን፣ ትዕዛዝ የተሰጠው ፖሊስ በዚህ ጊዜ ውስጥ ማቅረብ ሲገባው አለማቅረቡ ተገቢ አለመሆኑንና ያቀረበውን ምክንያት ፍርድ ቤቱ ሊቀበለው እንደማይገባ ተናግረዋል፡፡
ፍርድ ቤቱም ነገ ይቀርባሉ የተባሉ ሁለት ምስክሮችን ለመስማትና ቀሪ ምስክሮችን በተመለከተ ተገቢውን ብይን ለመስጠት ለነገ ግንቦት 10 ቀን 2009 ዓ.ም ተለዋጭ ቀጠሮ ሰጥቷል፡፡


በተመሳሳይ አርበኞች ግንቦት ሰባትን ለመከላቀል ወደ ኤርትራ ሲሄዱ እንደተያዙ በመግለፅ የፌደራል ዓቃቢ ህግ የሽብር ክስ የመሰረተባቸው 7 ተከሳሾች ዓቃቢ ህግ ምስክሮቹን ባለማቅረቡ በድጋሜ ለሰኔ 08 ቀን 2009 ዓ.ም ተቀጥረዋል፡፡በዚህ መዝገብ ክስ የቀረበባቸው ተከሳሾ አቶ ጌታቸው አዱኛ፣አቶ አሸናፊ ሞገስ፣አቶ ታደለ ብረሃኑ፣አቶ ዳንኤል አበራ፣አቶ ምስጋናው እና አቶ ጌታቸው ሃይሉ ናቸው፡፡