Please wait, video is loading...
NationalEr Interest
|• መራሕቲ ኤርትራን ግብጽን፡ ኣብ ምምዕባል ክልተኣዊ ዝምድናን ዞባውን ኣህጉራውን ጉዳያትን ዘትዮም።
[10 ጥቅምቲ 2024] - ሚ/ዜና MOI Eritrea
ፕረዚደንት ኢሳይያስ ኣፈወርቂን ፕረዚደንት ሪፓብሊክ ግብጺ ዓብዱልፋታሕ ኣልሲሲን፡ ሎሚ 10 ጥቅምቲ ኣብ ሰዓታት ድሕሪ-ቐትሪ ኣብ ኣዳራሽ ሃገር ኣብ ዝገበርዎ ርክብ፡ ኣብ ክልተኣዊ ዝምድናን ዝያዳ ንምምዕባሉ ዘሎ ዕድላትን፡ ከምኡ’ውን ኣብ ሓባራዊ ኣገዳስነት ዘለዎም ዞባውን ኣህጉራውን ጉዳያት ዘተኰረ ዘተ ኣካዪዶም።
ኣብ’ዚ ኣካልን መቐጸልታን ክልተኣዊ ምምኽኻር ኣብ ኣገደስቲ ጉዳያት ዝዀነ ርክብ፡ ፕረዚደንት ኢሳይያስን ፕረዚደንት ኣልሲሲን፡ ምኽባር መትከላት ኣህጉራዊ ሕጊ - መሰረት ዞባዊ ሰላም፡ ርግኣትን ምትሕግጋዝን ምዃኑ ብምግንዛብ፡ ልኡላውነት፡ ናጽነትን ግዝኣታዊ ሓድነትን ሃገራት’ዚ ዞባ ክኽበር፣ ኣብ ትሕቲ ዝዀነ ምኽንያት፡ ኣብ ውሽጣዊ ጉዳያት ሃገራት’ዚ ዞባ ዝግበር ምትእትታው ክውገድ፣ ዞባዊ ርግኣት ንምርግጋጽ ውሁድ ጻዕሪታት ክድንፍዕ፣ ከምኡ’ውን ዘላቒ ሓባራዊ ልምዓት ንምርግጋጽ ዝሕግዝ ምቹእ ሃዋህው ክፍጠር ኣብ ምርድዳእ በጺሖም።
ክልቲኦም መራሕቲ ብተወሳኺ፡ ኣብ ዝተፈላለየ መዳያት ዘሎ ክልተኣዊ ምትሕግጋዝ፡ ንብልጽግናን ልምዓትን ክልቲኡ ህዝብታት ብዘገልግል ንምምዕባሉ ዘሎ ድሌትን ድልውነትን ብምርግጋጽ ብዝለዓለ ክስራሓሉ፣ ከምኡ’ውን ዝተፈላለየ ዞባውን ኣህጉራውን ጉዳያትን ሓባራዊ ኣገዳስነት ዘለዎ ጂኦፖለቲካዊ ምዕባለታትን ብዝምልከት ኣብ መንጐ ክልተአን ሃገራት ዝግበር ፖለቲካዊ ምምኽኻር ንምዕዛዝ፡ ብሚኒስተራት ጉዳያት ወጻኢ ዝቘመትን ስሩዕ ርክባት እተካይድን ሓባራዊት ኮሚተ ክትቀውም ተሰማሚዖም።
መራሕቲ ኤርትራ፡ ግብጽን ሶማልን ብድሕሪ’ዚ ኣብ ዝገበርዎ ስሉሳዊ ርክብ፡ ብዛዕባ ኩነታት ሶማል ብመንጽር ዞባዊ ምዕባለታት፣ ሽግር ሱዳንን ናይ መጻኢ ኣመታቱን፣ ከምኡ’ውን ጉዳያት ጸጥታን ምትሕግጋዝን ምስ ቀይሕ ባሕሪን መጻብቦ ባብ ኤል-መንደብን ዝዳወባ ሃገራት ብዕምቈት ዘትዮም።
ሰለስቲኦም መራሕቲ ኣብ ዘውጽእዎ ሓባራዊ መግለጺ፡ ዝምድና ሃገራቶም ንምምዕባልን ንምዕማቚን፣ ዓቕሚታት ሃገራዊ ትካላትን ሰራዊትን ሶማል ብምጉልባት ኩሉ ዓይነታት ግብረ-ሽበራ ንምብዳህ፣ ከምኡ’ውን ሶማል መሬታውን ባሕራውን ዶባታን ግዝኣታዊ ሓድነታን ንምዕቃብ ኣብ ዘኽእል ነጥብታት ከምእተረዳድኡ ገሊጾም።
ኣብ’ቲ ኣጋጣሚ፡ ፕረዚደንት ኣልሲሲ፡ ስለ’ቲ ብፕረዚደንት ኢሳይያስ ዝተገብረሉ ዕድመን ምዉቕ ሕውነታዊ ኣቀባብላን እንግዶትን ምስጋና ኣቕሪቡ።
ብኻልእ ወገን፡ መራሕቲ ግብጽን ሶማልን ኣብ ዝገበርዎ ክልተኣዊ ርክብ፡ ዝምድናታቶምን ሽርክነታዊ ምትሕግጋዞምን ንምምዕባል ተረዳዲኦም።
ፕረዚደንት ሪፓብሊክ ግብጺ ዓብዱልፋታሕ ኣልሲሲ ኣብ ሰዓታት ቅድሚ-ቐትሪ ኣስመራ ኣብ ዝኣተወሉ፡ ፕረዚደንት ኢሳይያስ ኣብ ኣህጉራዊ መዓርፎ ነፈርቲ፡ ብናይ ክብሪ ሰልፊን ሃገራዊ መዛሙር ኤርትራን ግብጽን ዝተሰነየ ወግዓዊ ኣቀባብላ ገይሩሉ።
ሚኒስተር ሃገራዊ ጸጥታ ሜጀር ጀነራል ዓባስ ካምል፡ ሓለቓ ፕረዚደንታዊ ካቢነ ሜጀር ጀነራል ኣሕመድ ዓሊ፡ ከምኡ’ውን ሚኒስተር ጉዳያት ወጻኢ ዶ/ር በድር ኣሕመድ ዓብዱልዓጢ፡ ምስ ፕረዚደንት ኣልሲሲ ሓቢሮም መጺኦም ነይሮም።
ኣብ’ቲ ናይ ምቕባል ስነ-ስርዓት፡ ሚኒስተራትን ላዕለዎት ሰበ-መዚ ህዝባዊ ግንባር ንደሞክራስን ፍትሕን ተረኺቦም ነይሮም።
እዚ ከም’ዚ’ሉ እንከሎ፡ ፕረዚደንት ሶማል ሓሰን ሼኽ ማሕሙድ፡ ሎሚ ኣብ ሰዓታት ቅድሚ-ቐትሪ፡ ኣብ ሓይሊ ኣየር ኤርትራ ንዝስልጥኑ ዘለዉ ኣባላት ሃገራዊ ሰራዊት ሶማል ብምብጻሕ፡ ምስኦም ዘትዩ።
ፕረዚደንት ሪፓብሊክ ግብጺ ዓብዱልፋታሕ ኣልሲሲን ፕረዚደንት ፈደራላዊት ሪፓብሊክ ሶማል ሓሰን ሼኽ ማሕሙድን፡ ብዕድመ ፕረዚደንት ኢሳይያስ ኣብ ኤርትራ ዝገበርዎ ወግዓዊ ምብጻሕ ዛዚሞም፡ ኣብ ሰዓታት ድሕሪ-ቐትሪ ተፋንዮም።
ፕረሲደንት ግብጺ ኣስመራ ኣትዩ ! ኣስመራ ኣጋይሻ ብፍሕሹዉ ገጻ ትቅበል!
፡ ኣብ ምሕያል ዝምድናን ምፍታሕ ዞባዊ ጸጥታን ምርግጋእን ዘተኮረ ስሉሳዊ ዋዕላ ይካየድ ኣሎ።
ኣብ ምድንፋዕ ዞባዊ ምርግጋእን ምትሕብባርን መሰረታዊ መትከላት ኣህጉራዊ ሕጊ ምኽባር ኣገዳሲ ምዃኑ ኣስሚሩሉ።
መደብ ስልጠና ወጻኢ ሃገራት ብዛዕባ ኣህጉራዊ ጉዳያት ንዲፕሎማስያዊ ሓለፍቲ ካብ ኤርትራ ብኣምባሳደር ቻይና ኣብ ኤርትራ ተመሪቆም።
