የጄኔራሉ ወንድም በ100 ሺሕ ብር ዋስትና እንዲለቀቁ የተፈቀደላቸው አቶ ኢሳያስ ዳኘው ከእስር አልተፈቱም

የብረታ ብረትና ኢንጂነሪንግና ኮርፖሬሽን (ሜቴክ) የቀድሞ ዋና ዳይሬክተር ሜጀር ጄኔራል ክንፈ ዳኘው ወንድም አቶ ኢሳያስ ዳኘው ከ23 ቀናት በፊት በ100 ሺሕ ብር ዋስትና ከእስር እንዲፈቱ የተፈቀደላቸው ቢሆንም፣ ከእስር አለመፈታታቸውንና ለተጨማሪ ክርክር ለረቡዕ ጥር 29 ቀን 2011 ዓ.ም. ተቀጠሩ፡፡

አቶ ኢሳያስ የኢትዮ ቴሌኮም ኤንጂፒኦ ዳይሬክተር ሆነው በሚሠሩበት ወቅት፣  ከወንድማቸው ጋር በጥቅም በመመሳጠር በሕገወጥ መንገድ ያለ ጨረታ ለሜቴክ የሞባይል ኔትወርክ ማስፋፊያ ፕሮጀክት በመስጠትና ያለ ሥልጣናቸው ውል በማሻሻል፣ በመንግሥት ላይ ጉዳት አድርሰዋል ተብለው ተጠርጥረው ከሁለት ወራት በላይ በእስር ላይ መቆየታቸውን መዘገባችን ይታወሳል፡፡

የፌዴራል ፖሊስ ወንጀል ምርመራ ቡድን ተጠርጣሪው ስለመመሳጠራቸውም ሆነ በሌላቸው ሥልጣን ውል ስለማሻሻላቸው የሚያሳይ በቂ መረጃ ሊያቀርብ አለመቻሉን በመግለጽ፣ የፌዴራል ከፍተኛ ፍርድ ቤት አሥረኛ ወንጀል ችሎት በ100 ሺሕ ብር ዋስ ከእስር እንዲፈቱ ጥር 6 ቀን 2011 ዓ.ም. ትዕዛዝ ሰጥቶ ነበር፡፡

በፍርድ ቤቱ ትዕዛዝ ቅር የተሰኘው መርማሪ ቡድን ለፌዴራል ጠቅላይ ፍርድ ቤት ይግባኝ በማለት ዋስትናውን ለማሳገድ አቤቱታ ቢያቀርብም፣ ፍርድ ቤቱ እንዳልተቀበለው ታውቋል፡፡ መርማሪ ቡድኑ ዋስትናውን ለማሳገድ ያቀረበው ይግባኝ ተቀባይነት ሲያጣ፣ ዓቃቤ ሕግ ክስ የመመሥረቻ ጊዜ 15 ቀናት እንዲፈቀድለት በመጠየቁ ፍርድ ቤቱ አሥር ቀናት ፈቅዶለት ነበር፡፡

ዓቃቤ ሕግ በተፈቀደለት ጊዜ ክስ መመሥረት ካልቻለ ለሥር ፍርድ ቤት አቅርቦ እንዲያስወስን በተሰጠው ትዕዛዝ መሠረት፣ ተጠርጣሪውን ሰኞ ጥር 27 ቀን 2011 ዓ.ም. ከፍተኛ ፍርድ ቤት አቅርቧቸዋል፡፡ ዓቃቤ ሕግ ክስ መሥርቶ ባለመቅረቡ የተጠርጣሪ ቤተሰቦች ከ23 ቀናት በፊት የተሰጠውን የዋስትና መብት በማሟላት ከእስር ለማስፈታት ሲቀርቡ፣ ዓቃቤ ሕግ ደግሞ የክስ መመሥረቻ ጊዜ 15 ቀናት እንዲፈቀድለት ጥያቄ አቅርቧል፡፡

ፍርድ ቤቱ በዓቃቤ ሕግ ጥያቄ ላይ አከራክሮ ውሳኔ ለመስጠት ለረቡዕ ጥር 29 ቀን 2011 ዓ.ም. ቀጠሮ ሰጥቷል፡፡


► መረጃ ፎረም - JOIN US
► MEREJA TV YOUTUBE CHANNEL - SUBSCRIBE