በአርባምንጭ ዩኒቨርሲቲ በማንና ለምን እንደ ተከፈተ የማይታወቅ የት/ት ክፍል (ዲፓርትመንት) ተገኘ!!

በአርባምንጭ ዩኒቨርሲቲ በማንና ለምን እንደ ተከፈተ የማይታወቅ የት/ት ክፍል (ዲፓርትመንት) ተገኘ!!

በአርባምንጭ ቴክኖሎጂ ኢንስትቲውት ስር ዩኒቨርስቲውና ትምህርት ሚንስቴር የሚያውቋቸው የተለያዩ የትምህርት ክፍሎች እንዳሉ ቢታወቅም ዛሬ የተሰማው ዜና ግን አስገራሚም አሳፋሪም ሆኗል፡፡ Production Engineering በሚባል ትምህርት ክፍል ውስጥ እስከ አምስተኛ ዓመት የደረሱ ተማሪዎችን እያስተማረ የቆየው የአርባምንጭ ቴክኖሎጂ ኢንስቲትዩት በዛሬው ዕለት ከዩኒቨርስቲው የአካዳሚክ ጉዳዮች ም/ፕሬዚዳንት በተሰማው ወሬ ይህንን ትምህርት ክፍል እሳቸውም ሆኑ ሌሎች የዩኒቨርስቲው የበላይ አመራሮች እንደማያውቁት ተገልጿል፡፡

በዚህም መነሻነት የትምህርት ክፍሉ ከአንደኛ እስከ አምስተኛ ዓመት ያሉ ተማሪዎች በዛሬው ዕለት በዩኒቨርስቲው ቅጥር ግቢ ውስጥ ሰላማዊ ሰልፍ ያደረጉ ሲሆን ከተማሪዎቹ እንደተገኘው መረጃ ከሆነ ስለ ትምህርት ክፍሉ የጠራ መረጃ ስጡን አለበለዚያ በማይታወቅ ዲፓርትመንት አንማርም በማለት በተለያዩ ጊዜያቶች አቤቱታቸውን ለዩኒቨርስቲው አመራሮች እያቀረቡ የቆዩ ቢሆንም የትምህርት ክፍሉ ኃላፊ የሆኑት አቶ አታክልቲ ትምህርት ክፍሉ ከሌሎች ትምህርት ክፍሎች የተሻለ እንደሆነና ሲመረቁም ሜቴክ እንደሚቀጥራቸው በመናገር ሲያታልሏቸው እንደነበረ ገልጸዋል፡፡ በተጨማሪም ተማሪዎቹ በዚህ ዓመት ወደ ተለያዩ ተቋማት practice ወጥተን ለመስራት የተመደብን ብንሆንም የሄድንባቸው ተቋማት በሙሉ production Engineering የሚባል ትምህርት ክፍል አናውቅም በማለት እንደመለሷቸው ተናግረዋል፡፡ በዩኒቨርሲቲው ይህ ዲፓርትመንት ሲከፈት ጀምሮ አሻጥር ያለበትና ላልተገባ ጥቅም ተብሎ የተከፈተ መሆኑን ዘግይተው ማወቃቸውን ተማሪዎቹ አክለው ተናግረዋል።

በዚህ ጉዳይ ላይ የዩኒቨርሲቲው ፕሬዘዳንትን ጨምሮ ሌሎች የሚመለከታቸው አካላት በዛሬው እለት ሰልፍ የወጡ የትምህርት ክፍሉን ተማሪዎችን በመሰብሰብ ያነጋገሩ ሲሆን ይህ ዲፓርትመንት በዩኒቨርስቲው ውስጥ እንዳለ እንደማያውቁ አመራሮቹ ለተማሪዎች በድጋሚ ተናግረዋል፡፡ የዩኒቨርስቲው ፕሬዚዳንት ዶ/ር ዳምጠው ዳርዛ የትምህርት ክፍሉ ኃላፊ የሆኑትን አቶ አታክልቲን ትምህርት ክፍሉን ከየትኛው አካል ፈቃድ አግኝተው እንደከፈቱት መረጃ እንዲያቀርቡና ይህ ካልሆነ ግን በህግ እንደሚጠየቁ ተናግረዋል። በማያያዝም ዶ/ር ዳምጠው አንደኛና ሁለተኛ ዓመት የሆኑት የትምህርት ክፍሉ ተማሪዎች ወደ ሌላ ትምህርት ክፍል እንደሚዘዋወሩ ገልጸው ለ4ኛ እና 5ኛ ዓመቶች ተማሪዎች ግን ከሚመለከታቸው አካላት ጋር ተነጋግረው በቅርቡ ምላሽ እንደሚሰጧቸው ተናግረዋል፡፡

አርባምንጭ ዩኒቨርስቲ ከዚህ አሳፋሪና አሳዛኝ ከሆነ ተግባሩ ባሻገር የመልካም አስተዳደር ችግሮች የሚጎሉበትና ከፍተኛ የሆኑ የገንዘብ ምዝበራዎች የሚፈጸሙበት ተቋም እንደሆነ በቅርቡ ከትምህርት ሚንስቴር ተወክለው ወደ ዩኒቨርስቲው በመጡ አካላት ጭምር የሚታወቅ ነው፡፡


► መረጃ ፎረም - JOIN US
► MEREJA TV YOUTUBE CHANNEL - SUBSCRIBE