ህግ የማያከብሩ ፓርቲዎችን የምርጫ ቦርድ አስጠነቀቀ


መረጃ ቲቪ አባል በመሆን የሳተላይት ቲቪውን ቀጥታ ስርጭት፣ ወቅታዊ ዜናዎችን እና ትንተናዎችን፣ የመዝናኛ ፕሮግራሞችን፣ ስፖርት እና ሌሎችንም ዝግጅቶቻችንን በፍጥነት እና ጥራት ስልክዎ፣ ኮምፒዩተርዎ ወይም ቲቪዎ ላይ ማየት ይችላሉ። እዚህ ሊንክ ላይ በመጫን አባል ይሁኑ


የምርጫ ቦርድ የተቀመጠውን ህግ የማያከብሩ ፓርቲዎችን አስጠነቀቀ

 (ኢዜአ) ከተቀመጠው የጊዜ ሰሌዳ ውጭ የምርጫ ቅስቀሳ የሚያደርጉ የፖለቲካ ፓርቲዎች ከድርጊታቸው እንዲቆጠቡ ብሔራዊ የምርጫ ቦርድ አስጠነቀቀ።

የመገናኛ ብዙሃን የምርጫ ዘገባ ተደራሽነትና ሚና ላይ ቦርዱ ከመገናኛ ብዙሃን ባለሙያዎች ጋር እየመከረ ነው።

በአሁኑ ወቅት ፓርቲዎች ህጉ ከሚፈቅደው ውጭ በቀጥታና በተዘዋዋሪ ቅስቀሳ እያደረጉ መሆናቸውን በተመለከተ የውይይቱ ተሳታፊዎች ጥያቄ አንስተዋል።

ለጥያቄው ምላሽ የሰጡት የቦርዱ ምክትል ሰብሳቢ አቶ ውብሸት አየለ “ቦርዱ በመጪዎቹ ጥቂት ቀናት ውስጥ የመጨረሻውን የምርጫ ሰሌዳ በማውጣት እንደሚያሳውቅና ከተጠቀሰው ጊዜ በኋላ ህግ የማስከበር ስራውን ወደተግባር እንለውጠዋለን” ብለዋል።

የምርጫ ሰሌዳው የመጨረሻ ቀን ከተቆረጠ በኋላ “እንደ እስከ ዛሬው ተቻችለን የምናልፈው ጉዳይ ሳይሆን እርምጃ የምንወሰድበት ነው” ሲሉም ማሳሰቢያ ሰጥተዋል።

ምክክሩ ሚዲያና የመራጮች ትምህርት፣ የሚዲያ ሚና በመራጮች ትምህርት የውጭ ተሞክሮ፣ ምርጫ ቦርድና በመራጮች ትምህርት ዙሪያ ያለው ዝግጅት እንዲሁም የመገናኛ ብዙሃንና የጋዜጠኞች የምርጫ አዘጋገብ ስነ ምግባርና አሰራርን ለመደንገግ በወጣ መመሪያ ላይ እንደሚያተኩር ተገልጿል።

የምርጫ ቦርዱ ባወጣው ረቂቅ የጊዜ ሰሌዳ መሰረት ‘የምረጡኝ ዘመቻ’ ጊዜ ከሚያዚያ 27 እስከ ነሐሴ 5 ቀን 2012 ዓ.ም ነው።