ሜጀር ጀኔራል ክንፈ ዳኘውን ጨምሮ በ7 ተከሳሾች ላይ ዐቃቤ ህግ የተሻሻለ ክስ አቀረበ

ሜጀር ጀኔራል ክንፈ ዳኘውን ጨምሮ በ7 ተከሳሾች ላይ ዐቃቤ ህግ የተሻሻለ ክስ አቀረበ

የፌዴራሉ ከፍተኛ ፍርድ ቤት ልደታ ምድብ 15ተኛ የወንጀል ችሎት ዛሬ ሜጀር ጀኔራል ክንፈ ዳኘውን ጨምሮ በ7 ተከሳሾች ላይ የዐቃቤ ህግ የተሻሻለ ክስን አዳመጠ፡፡

በክሱም ላይ 1ኛ ተከሳሽ ሜጀር ጀኔራል ክንፈ ዳኘው፣ 2ተኛ ተከሳሽ ብርጋዴር ጀኔራል ጥጋቡ ፈትለ፣ 3ተኛ ተከሳሽ ሻለቃ ገብረስላሴ ገብረጊዮርጊስ፣ 4ተኛ ተከሳሽ ሻለቃ ፋሲል አበራ ሃይሉ፣ 5ተኛ ተከሳሽ መቶ አለቃ ቶማስ ደረሰ፣ 6ተኛ ተከሳሽ ወሰንየለህ ኃይለሚካኤል፣ 7ተኛ ተከሳሽ ህድአት ወልደተንሳይ እና 8ተኛ ተከሳሽ ዶ/ር መኮንን ገብረሚካኤል ተጠቅሰዋል፡፡

ተከሳሾቹ በአሜሪካም ሆነ በኢትዮጵያ ደረጃ የማይታወቅና ከብረታ ብረትና ኢንጅነሪንግ ኮርፖሬሽን የትምህርትና ስልጠና አፈፃፀም መመሪያ ውጭ “ካሊፎርኒያ ኢንተርናሽናል ኢንስቲትውት ኦፍ ቴክኖሎጂ” በሚል ሀሰተኛ ተቋም በማቋቋም ከብረታ ብረትና ኢንጅነሪንግ ኮርፖሬሽን የውል ስምምነት እንዲፈፀምና ክፍያው በውጭ ምንዛሬ እንዲሆን በማድረግና ድርጊቱ በኢትዮጵያ መንግስት እንዳይታወቅ መምህራን በቱሪስት ቪዛ ከውጭ በማስመጣትና ያለትምህርት ዲግሪ በመስጠት እንዲሁም በማስተማር ሽፋን የሀገሪቱን የውጭ ምንዛሬ ወደ ውጭ በማሸሽ ወንጀል መከሰሳቸውን የዐቃቤ ህግ የክስ መዝገብ ያስረዳል፡፡

በዚህ ሀሰተኛ የትምህርት ተቋም በታዳሽ ሀይልና በኦፕሬሽን ማኔጅመንት በማስተርስ እና በፒ.ኤች.ዲ ደረጃ ትምህርት ለመስጠት በ2006 ዓ.ም የአንድ ሚሊዮን 393 ሺህ 300 ዶላር፣ በ2007 ዓ.ም የ698 ሺህ 650 እንዲሁም በ2008 ዓ.ም የአንድ ሚሊዮን 397 ሺህ 300 ዶላር ውል መፈረሙንና የትምህርት ካሪኩለም ሳይቀረጽ ትምህርት መስጠት ተጀምሮ የነበረ መሆኑን ክሱ ያስረዳል፡፡

በተመሳሳይ በ2009 ዓ.ም በኢንዱስትሪያል ኢኮኖሚክስ በማስተርስና በፒ.ኤች.ዲ ደረጃ ትምህርት ለመስጠት የአንድ ሚሊዮን 903 ሺህ 225 የአሜሪካን ዶላር ከብረታብረትና ኢንጅነሪንግ ኮርፖሬሽን ውል መውሰዱን ከተሻሻለው የዐቃቤ ህግ የክስ መዝገብ ለመረዳት ተችሏል፡፡

ተከሳሾች በሶስት የተለያዩ የትምህርት መስኮች በአሜሪካ ሆነ በኢትዮጵያ ደረጃ ከማይታወቅ የፈጠራ ተቋም ትምህርት ለመስጠት በሚል አራት ውሎችን በመዋዋል ለሀሰተኛ ተቋሙ 3 ሚሊዮን 901 ሺህ 140 ዶላር ወይም 75 ሚሊዮን 114 ሺህ 030 ብር አሜሪካን ሀገር በከፈታቸው የሂሳብ ቁጥሮች ገቢ ማድረጋቸውንም ተነግሯል፡፡

ስለሆነም ፍርድ ቤቱ ዛሬ በዋለው ችሎት ተከሳሾች ዐቃቤ ህግ ያቀረበባቸውን የተሻሻለ ክስ መሰረት በማድረግ በፅሁፍ ያላቸውን አስተያየት ለመጋቢት 9/2011 ዓ.ም እንዲያቀርቡ በይኗል፡፡

ምንጭ፦የኢፌዴሪ ጠቅላይ ዐቃቤ ሕግ


► መረጃ ፎረም - JOIN US
► MEREJA TV YOUTUBE CHANNEL - SUBSCRIBE